ಕೊನಗವಳ್ಳಿ ಗ್ರಾಮದಲ್ಲಿ ರೈತ ಯೊಗೇಶಪ್ಪ, ಹೃದಯಾಘಾತದಿಂದ ಸಾವು –

ಶಿವಮೊಗ್ಗ ತಾಲೂಕು ಹಾರ್ನಹಳ್ಳಿ ಹೋಬಳಿಯ ಕೊನಗವಳ್ಳಿ ಗ್ರಾಮದಲ್ಲಿ ರೈತ ಯೋಗೆಷಪ್ಪ (55) ಅವರು ಹಠಾತ್ ಹೃದಯಾಘಾತದಿಂದ ಮೃತಪಟ್ಟ ದಾರುಣ ಘಟನೆ ನಡೆದಿದೆ.

ಮೃತ ಯೋಗೆಷಪ್ಪ ಅವರು ಬೆಳಿಗ್ಗೆ ತಮ್ಮ ಹೊಲದಲ್ಲಿ ಗೊಬ್ಬರ ಹಾಕುವ ಕೆಲಸದಲ್ಲಿ ತೊಡಗಿಕೊಂಡಿದ್ದರು.  ಗದ್ದೆಯಲ್ಲಿ ಶ್ರಮಿಸಿ, ಮನೆಗೆ ಹಿಂದಿರುಗಿದಾಗ  ಏಕಾಏಕಿ ಎದೆ ನೋವು ಕಾಣಿಸಿಕೊಂಡಿದ್ದು, ಸ್ಥಳದಲ್ಲಿಯೇ ಅವರು ಕುಸಿದುಬಿದ್ದರು. ತಕ್ಷಣ ಗ್ರಾಮಸ್ಥರು ನೆರವಿಗೆ ಧಾವಿಸಿದರೂ, ಅವರೆಲ್ಲರ ಮುಂದೆಯೇ ಪ್ರಾಣ ತ್ಯಜಿಸಿದರು. ಕುಟುಂಬದಲ್ಲಿ ಪತ್ನಿಯ ಜೊತೆಗೆ ಇಬ್ಬರು ಮಕ್ಕಳು ಬಿಟ್ಟು ಅಗಲಿದ್ದಾರೆ.

ಕಳೆದ ಕೆಲವು ತಿಂಗಳಿನಿಂದ ರೈತರಲ್ಲಿ ಹಠಾತ್ ಹೃದಯಾಘಾತ ಪ್ರಕರಣಗಳು ಹೆಚ್ಚುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ. ನಿರಂತರ ಶಾರೀರಿಕ ಶ್ರಮ, ಹೆಚ್ಚುತ್ತಿರುವ ಆರ್ಥಿಕ ಒತ್ತಡ, ಬೆಳೆ ನಷ್ಟದ ಭೀತಿ ಹಾಗೂ ಜೀವನ ನಿರ್ವಹಣೆಯ ಹೋರಾಟಗಳು ರೈತರ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತಿರುವುದಾಗಿ ಗ್ರಾಮಸ್ಥರು ಆತಂಕ ವ್ಯಕ್ತಪಡಿಸಿದ್ದಾರೆ. ಇತ್ತೀಚೆಗೆ ಜಿಲ್ಲೆಯಲ್ಲಿ ಇಂಥ ಹಲವು ಘಟನೆಗಳು ವರದಿಯಾಗಿದ್ದು, ರೈತರ ಸಮುದಾಯದಲ್ಲಿ ಭೀತಿ ಹೆಚ್ಚಿಸಿದೆ.

ಯೋಗೆಷಪ್ಪ ಅವರು ಪರಿಶ್ರಮಿ ರೈತರಾಗಿ ಪರಿಚಿತರಾಗಿದ್ದು, ಬೆಳೆ ಬೆಳೆಸುವಲ್ಲಿ ಸದಾ ತೊಡಗಿಸಿಕೊಂಡಿದ್ದರು. ಅವರ ಅಕಾಲಿಕ ಮರಣ ಗ್ರಾಮದಲ್ಲಿ ಆಘಾತ ಉಂಟುಮಾಡಿದ್ದು, ಕುಟುಂಬದ ದುಃಖದಲ್ಲಿ ಗ್ರಾಮಸ್ಥರು ಪಾಲ್ಗೊಂಡಿದ್ದಾರೆ. ಸ್ಥಳೀಯರು ಸರ್ಕಾರವು ರೈತರ ಆರೋಗ್ಯದ ಕಡೆ ಹೆಚ್ಚಿನ ಗಮನ ಹರಿಸಿ, ಗ್ರಾಮೀಣ ಪ್ರದೇಶಗಳಲ್ಲಿ ತುರ್ತು ಆರೋಗ್ಯ ಸೇವೆಗಳನ್ನು ಸುಲಭವಾಗಿ ಲಭ್ಯವಾಗುವಂತೆ ಮಾಡಬೇಕೆಂದು ಆಗ್ರಹ ವ್ಯಕ್ತಪಡಿಸಿದ್ದಾರೆ.

ರೈತರ ಹೃದಯಾಘಾತ ಪ್ರಕರಣಗಳ ಏರಿಕೆಗೆ ತಜ್ಞರಿಂದ ವೈದ್ಯಕೀಯ ಅಧ್ಯಯನ ನಡೆಯಬೇಕೆಂಬ ಬೇಡಿಕೆ ಕೂಡಾ ಹೆಚ್ಚುತ್ತಿದೆ. “ಕೃಷಿಕರ ಆರೋಗ್ಯವನ್ನು ಕಾಪಾಡುವುದು ಕೃಷಿ ಉಳಿಸುವುದಕ್ಕೆ ಸಮಾನ” ಎಂಬ ಮಾತುಗಳು ಈ ಸಂದರ್ಭ ಪುನಃ ನೆನಪಾಗುತ್ತಿವೆ.

ಯೋಗೆಷಪ್ಪ ಅವರ ನಿಧನ ಗ್ರಾಮದಲ್ಲೇ ಅಲ್ಲ, ಸಂಪೂರ್ಣ ರೈತ ಸಮುದಾಯಕ್ಕೂ ನೋವನ್ನುಂಟುಮಾಡಿದೆ.